AVALIACIÓN DAS PUBLICACIÓNS CIENTÍFICAS

• ¿Podo solicitar á Biblioteca datos sobre as publicacións científicas (factor de impacto, bases de datos nas que están incluídas, etc,) para avaliación da actividade investigadora?

• ¿Que criterios se teñen en conta para avaliar as publicacións científicas?

• ¿Que é o Factor de Impacto?

• ¿Que ferramentas hai para localizar os índices de impacto?

• ¿Que ferramentas teño para localizar que citas recibiron as miñas publicacións?

• ¿Onde podo atopar datos sobre a calidade das revistas?

• ¿Como podo saber en que bases de datos está indizada unha revista?

• ¿Onde localizo indicios de calidade dun libro?

• ¿Como podo saber cales son as revistas de máis calidade no meu ámbito?
  

• ¿Que é o Índice H?

¿Podo solicitar á Biblioteca datos sobre as publicacións científicas (factor de impacto, bases de datos nas que están incluídas, etc.) para a avaliación da actividade investigadora?

A Biblioteca pode proporcionar certos datos das publicacións científicas como son o factor ou índices de impacto, bases de datos nas que están incluídas as revistas, citas recibidas, etc., pero non outro tipo de información, valoracións ou interpretacións das distintas convocatorias (CNEAI, ANECA, ANEP, ACSUG) que terás que consultar a axencia ou organismo correspondente.

Se queres que a Biblioteca realice a busca destes datos sobre as túas publicacións, cubre este impreso e envíao a referencia@uvigo.es

¿Que criterios se teñen en conta para avaliar as publicacións científicas?

Os criterios varían segundo a convocatoria (CNEAI, ANECA, ACSUG...), a disciplina científica e o tipo de publicación (revista, libro ou capítulo de libro, congreso, etc.). En xeral, estes criterios teñen en conta:

• Índice de impacto da publicación
• Número de citas recibidas
• Inclusión en bases de datos
• Calidade editorial da publicación
  
  
  

¿Que é o factor de impacto?

O JCR (Journal Citation Report) calcula o factor de impacto dunha revista como a media de veces que nun ano determinado foron citados os artigos publicados por esa revista nos dous anos anteriores. Outros recursos (Scimago, InRecs...) elaboran tamén índices de impacto, pero empregando outros sistemas de cálculo.

Ademais do factor de impacto é importante sinalar a posición da revista respecto ao total da categoría na que está englobada, e o cuartil ou tercil no que se sitúa. Débese empregar o ano do produto correspondente ao ano de publicación do traballo, e de non ser posible o máis próximo ou actual.

¿Que ferramentas hai para localizar os índices de impacto?

• JCR: Journal Citation Report é o recurso máis valorado nas distintas convocatorias. Obtén os datos das revistas analizadas polo ISI, polo que hai poucas publicacións españolas, e non inclúe o ámbito das Humanidades. Nesta presentación da FECYT tes unha explicación de como se busca no JCR.
• SJR Scimago Journal & Country Rank para todos os ámbitos, obtén os datos das citas da base de datos Scopus.

Para as revistas españolas non incluídas en JCR nin en SJR Scimago:

• IN-RECS proporciona información sobre o impacto científico das revistas españolas de Ciencias Sociais, dos autores que publican nas mesmas e das institucións ás que pertencen.
• IN-RECJ como IN-RECS pero para Dereito.
• IN-RECH como IN-RECS pero para Humanidades.
• RESH aporta os datos de impacto obtidos segundo a fórmula clásica do impact factor pero cunha ventá de citación de 3 anos para as revistas de Ciencias Sociais e de 5 anos para as revistas de Humanidades.
• Factor de Impacto Potencial de las Revistas Médicas Españolas

Outros recursos:

• CiteSEER para Informática, Enxeñería e Ciencias da Información.
• CORE (Computing Research and Education) elabora unha clasificación dos congresos celebrados no campo da Enxeñería da Computación e Tecnoloxía da Información.
• CS Conference Ranking establece unha clasificación de congresos celebrados en Enxeñería da Computación e Informática.
• CitEc (Citations in Economics)  publica rankings de revistas e documentos de traballo en Economía.
• IDEAS/RePEc Simple Impact factors for Journals calcula o índice de impacto das revistas de Economía en base aos datos proporcionados polo proxecto CitEc.
• Eigenfactor  elaborado pola Washingston University de Seattle clasifica as revistas usando as redes sociais como ferramenta de ponderación. Ofrece dous indicadores propios: Eigenfactor Score (EF) e Article Influence Score (AI). O JCR inclúe o Eigenfactor nos seus resultados dende o ano 2009.

¿Que ferramentas teño para localizar que citas recibiron as miñas publicacións?

• Web of Science subdividida en tres eidos: Science Citation Index, Social Sciences Citation Index e Art & Humanities Citation Index. Predominan as revistas de países anglosaxóns e en lingua inglesa. Nestes titoriais tes unha explicación de como se buscan as citas a un traballo e como crear un informe de citas.
• Scopus multidisciplinar, indiza máis de 18000 publicacións científicas, ofrecendo as referencias citadas dende o ano 1996.
• In-Recs / In-Recj ademais de proporcionar información sobre o impacto científico das revistas españolas de Ciencias Sociais e Xurídicas , permite coñecer as citas que reciben os traballos publicados nestas revistas.
• Google Scholar centrado na documentación científica cubre artigos de revistas, libros, comunicacións e ponencias a congresos, informes científico-técnicos, teses, repositorios, etc, localizando tamén as citas recibidas por un documento. Útil para as Humanidades e Ciencias Sociais. Existen programas e aplicacións que axudan a traballar con Google Scholar como: Publish or Perish , Citation-Gadget e Tenurometer.
• Google Books para buscar, sobre todo, citas de libros e capítulos de libros.
• CiteSEER para Informática, Enxeñería e Ciencias da Información. É un buscador de artigos científicos que analiza automaticamente as referencias, permitindo a clasificación dos documentos tendo en conta dita análise.
• Econpapers no ámbito da Economía, proporciona citas e referencias bibliográficas en base aos datos de CitEc (Citations in Economics).
• Business Source Premier base de datos do ámbito económico-empresarial que recolle as citas recibidas por un artigo na mesma base de datos.
• SciFinder Scholar base de datos de Química que inclúe as citas dende 1999.
• MathSciNet Citation Database base de datos Matemática que permite localizar tamén as citas.
• PsycInfo base de datos de Psicoloxía e disciplinas relacionas que aporta as referencias bibliográficas.

¿Onde podo atopar datos sobre a calidade das revistas?

As revistas deben cumprir certos requisitos de calidade para ser tidas en conta nos procesos de avaliación (cando non están recollidas no JCR ou outros índices de impacto). Estes requisitos varían segundo a convocatoria pero, polo xeral, fan referencia á calidade informativa, calidade do proceso editorial, difusión e visibilidade, etc. Ademais da propia revista, os seguintes recursos aportan información sobre isto:

• DICE facilita, para as revistas españolas de Humanidades, Ciencias Sociais e Xurídicas, o coñecemento dalgunhas das características editoriais máis ligadas á calidade, como os mecanismos de avaliación de orixinais para publicar, a apertura dos órganos de xestión e dirección, a difusión das revistas en bases de datos de prestixio internacional, etc. ANECA emprega DICE como referencia de calidade das publicacións españolas, nos seus procesos de avaliación do profesorado.
• RESH ademais dos índices de citas de revistas españolas de Ciencias Sociais e Humanidades, aporta outros indicadores de calidade, tanto editorial como de visibilidade internacional a través da inclusión en bases de datos.
• CATÁLOGO LATINDEX para as revistas científicas de América Latina, España e Portugal. Consta de:
  - "Directorio" facilita información sobre os datos normalizados das revistas, organismo editor, responsables editoriais, bases de datos que cubren a revista, etc.
  - "Catálogo" subconxunto das revistas contidas no Directorio, con información adicional sobre os criterios de calidade cumpridos por cada unha delas. Para figurar no catálogo a revista ten que cumprir uns criterios mínimos, polo que a inclusión neste catálogo é de por si un indicio de calidade (pódese aportar tamén como indicio o número de criterios que se cumpren e cales).
  
• CIRC ten coma obxectivo a construción dunha clasificación de revistas científicas de Ciencias Sociais e Humanas en función da súa calidade, integrando os produtos de avaliación existentes considerados positivamente polas diferentes axencias de avaliación nacionais. Clasifica as revistas en distintas categorías: EX, A, B, C e D.
• MIAR aporta información para a identificación e avaliación de revistas científicas de Ciencias Sociais e Humanas. Analiza unhas 28.000 publicacións para determinar o seu índice de difusión (ICDS).
• ERIH inclúe listas de revistas europeas de Humanidades (Literatura, Psicoloxía, Historia, etc.) coa súa clasificación (INT1, INT2, NAT).
• Listaxe das revistas españolas que superaron o proceso de avaliación da calidade da FECYT
• Categorización de revistas científicas españolas de Humanidades (ANEP/FECYT) lista 2007 actualizada e visible a través da plataforma DICE.

¿Como podo saber en que bases de datos está indizada unha revista?

Para ser incluídas nunha base de datos as revistas pasan un proceso de avaliación da súa calidade formal e científica. Por isto, a presenza dunha revista nun maior número de bases de datos é un indicador de calidade.

A miúdo a propia revista proporciona esta información. Ademais, as bases de datos dispoñen dun "Master List" coas revistas que recollen, como o Master Journal List de Thomson Reuters (onde se poden localizar, entre outras, as revistas indexadas no Web of Science).
Tamén existen produtos especializados que ofrecen esta información:

• DICE facilita, para as revistas españolas de Humanidades, Ciencias Sociais e Xurídicas, o coñecemento dalgunhas das características editoriais máis ligadas á calidade e, entre elas, a difusión das revistas en bases de datos de prestixio internacional.
  
• ULRICH´S útil para as revistas estranxeiras, contén diversa información sobre publicacións periódicas e indica en que bases de datos están indizadas.
• MIAR aporta información para a identificación e avaliación de revistas científicas de Ciencias Sociais e Humanas. Analiza unhas 28.000 publicacións para determinar o seu índice de difusión (ICDS), que se calcula tendo en conta, entre outros indicadores, a súa presenza en bases de datos nacionais e internacionais.
• LATINDEX para as revistas científicas de América Latina, España e Portugal. O "Directorio" facilita información sobre os datos normalizados das revistas, bases de datos nas que está indizada, etc.
  
  
  
  

¿Onde localizo indicios de calidade dun libro?

Para ser valorados os libros e capítulos de libros deben cumprir unha serie de requisitos (distintos segundo as convocatorias e as disciplinas), como: prestixio da editorial; pasar un riguroso proceso de selección e avaliación; número de citas recibidas; recensión en revistas científicas; ter ISBN, etc. Para localizar algúns destes indicios temos, entre outros:

• Número de citas recibidas: Web of Science, Scopus, Google Scholar, Google Books
• Recensión en revistas científicas: Web of Science, Scopus, bases de datos da especialidade, Google , Dialnet
• Prestixio da editorial ou dos editores: non hai unha ferramenta específica para buscar este indicio, polo que teremos que argumentalo coa información oportuna da que dispoñamos ou podamos localizar.
• Riguroso proceso de selección e avaliación: documentos internos da propia editorial, publicados na web ou non.
  
  

¿Como podo saber cales son as revistas de máis calidade no meu ámbito?

As revistas recollidas no JCR Journal Citation Report son consideradas das máis prestixiosas nas distintas disciplinas. Como en JCR non existe un apartado para Arte e Humanidades, neste caso pode consultarse o Master Journal List do Arts & Humanities Citation Index.

¿Que é o Índice H?

É un novo método para medir a calidade e cantidade da produción científica dun autor/a. O Indice h é o balance entre o nº de publicacións e o nº das citas a estas. Para calculado hai que ordenar as publicacións polo número de citas recibidas en orden descendente, numeralas e identificar o punto no que o nº de orde coincide co de citas recibidas por unha publicación. Este número será o Indice h. Bases de datos como Web of Science e Scopus proporcionan este dato.