O impacto da marea negra do Prestige sobre as aves mariñas é evidente, a xulgar pola cantidade de aves petroleadas que chegan ó litoral galego e cantábrico. Malia todo, para sabe-lo total de aves afectadas, fai falta coñecer que proporción das aves que morren no mar chega finalmente ás praias. Para que a estima desta proporción teña certo rigor é preciso realizar probas experimentais.
Para isto, deseñouse un experimento na Universidade de Vigo en colaboración coa Dirección Xeral da Natureza da Xunta de Galicia, que require da colaboración de toda a xente implicada na recollida de aves e na limpeza das praias: proximamente botaremos un total de 500 bloques de madeira en diferentes puntos en alta mar, á espera de ver cantos deles chegan a terra e o lugar onde arriban. Os bloques (ver fotos) levan unha placa de plástico cun código (A ou F, seguido de 3 números) e un teléfono de contacto.

Por favor, en caso de atopar algún destes bloques chamade a calquera dos teléfonos indicados neles (Oficina de Medio Ambiente da Universidade de Vigo, 986.813883 ou 647.343044).